V ruta do Pincho Folk

2017.09.05 Pincho Folk

Tralo enorme éxito acadado os anos anteriores, O Alcalde, Marcos Besada, xunto coas Concelleiras de Comercio e Cultura do Concello de Salceda, Loli Castiñeira e Tere Pérez, acompañadas dunha representación dos hosteleiros da vila, veñen de presentar a V Ruta Pincho Folk, que se vai celebrar durante os venres e sábados do 8 ao 30 de setembro (ambos incluídos). Un total de 20 establecementos van participar na ruta, repartidos en duas rutas: venres e sábados. Nos locais serviranse pinchos ao prezo de 1 € en horario de 20:00 a 23:59.

A ruta de pinchos conta co engadido do folk, quedando aberta a participación a todos aqueles gaiteiros, pandeireteiras ou músicos en xeral que desexen asistir e pasar unas boas noites de foliada acompañados coa mellor gastronomía.

Os locais lucen xa un distintivo nas súas fachadas, que os sinala como establecementos participantes no Pincho Folk, diferenciando así mesmo entre a ruta dos venres e a ruta dos sábados.

Os/as clientes que degusten os pinchos de tódolos locais entrarán no sorteo de premios como circuítos termais, lotes de productos ou cheques en efectivo. Para elo terán que recoller as tarxetas de participación nos establecementos hosteleiros e ir cubríndoa con en cada un dos locais visitados. Tamén os/as hosteleiros/as optarán aos seus propios premios elexidos pola clientela: Premio ó mellor pincho e premio á/ó mellor hosteleira/o.

Loli Castiñeira, Concelleira de Comercio e Turismo, presentou o evento como una importante iniciativa para dinamizar o pobo e sobre todo os establecementos hosteleiros. “Pensamos en seguir organizando este tipo de eventos que apoien ao comercio local, neste caso á hostelería. O Concello plantexou a iniciativa e estamos moi satisfeitos coa acollida que tivo por parte dos diferentes establecementos e coa colaboración obtida dende o primeiro momento”.

Tere Pérez, Concelleira de Cultura, aproveitou para convidar aos diferentes grupos de música tradicional a participar no evento. “As diferentes iniciativas que levamos a cabo para as agrupacións de gaiteiros/as e pandeireteiros/as teñen sempre grande acollida, como no caso da Agrupación Gaiteira de Salceda ou do Serán dos Callos. Estamos seguras de que neste caso imos seguir na mesma liña, polo que aproveitamos para convidar a todos/as aqueles/as afeccionados/as á música tradicional para que veñen botar unhas pezas e desfrutar dos exquisitos pinchos que preparan os/as hosteleiros/as”.

 

Gabinete de prensa do Concello de Salceda de Caselas

5 de setembro de 2017