Superadas as expectativas do primeiro fin de semana do Bocaselas

As previsións do sector hostaleiro de Salceda resultaron insuficientes para atender aos centos de persoas que quixeron disfrutar da primeira fin de semana do Bocaselas. Tanto o venres como o sábado, os locais estiveron ateigados de persoas, demostrando así o acerto desta nova proposta gastronómica que ven de nacer no municipio. Sen dúbida o bo tempo destes días contribuíu ao éxito do evento, que se espera continúe nos días restantes. O sector hostaleiro tomou boa nota, e aumentarán as previsións de cara ás vindeiras fins de semana para poder atender a todas as persoas que se acheguen a disfrutar do Bocaselas.

Un total de 15 locais participan nesta primeira ruta de bocadillos, que se celebrará os venres e os sábados entre o 20 de abril e o 12 de maio (ambos incluídos). Establécense dúas rutas diferenciadas: unha para os venres con 9 locais participantes, e outra para os sábados na que son 6 os establecementos presentes, vendéndose os bocadillos ao prezo de 1,50 €, podendo acollerse en tódolos locais á oferta “bocatín + caña a 2,50 €”.

Concello e sector hostaleiro van da man nesta nova iniciativa que tras a primeira fin de semana ven de demostrar que o público de Salceda e arredores volve dar unha resposta positiva, e tamén por iso se prevén premios para as persoas que degusten os bocatas en varios establecementos, e que entrarán no sorteo de vales de compra para consumir nos locais participantes.

Loli Castiñeira, Concelleira de Comercio e Turismo: “Resulta especialmente satisfactorio ves os locais ateigados de xente como os vimos estes dous días. Salceda segue a ofrecer novas alternativas de ocio e tempo libre, converténdose xa en referencia en toda a comarca. Seguiremos a traballar man a man co sector hostaleiro así como co pequeno comercio, na busca dos mellores resultados”

 

Salceda de Caselas, 23 de abril de 2018