As Concellarías de Benestar Social e Formación do Concello de Salceda de Caselas, dirixidas por Tere Pérez e Loli Castiñeira respectivamente, xunto coa Asociación de Xubilados e Pensionistas do municipio, veñen de presentar a que será a primeira “Escola de Maiores” que se levará a cabo no Concello de Salceda.

Na Escola, os participantes adquirirán coñecementos de lingua e ortografía, cultura xeral, matemáticas e cálculo… con uns contidos que estarán continuamente adaptándose ao público ao que se destina esta actividade.

Dirixida ás persoas maiores do municipio, a Escola márcase como obxectivo primordial, ademáis da trasmisión de coñecementos aos participantes na actividade, sobre todo a integración, relación social, comunicación,  mellora da calidade de vida e envellecemento activo dos mesmos, así como a oportunidade de desenvolver a súa creatividade, aptitudes e habilidades.

A Asociación de Xubilados e Pensionistas, da man do seu presidente Antonio Rivero, tíñalle trasladado en diversas ocasións ao Concello a necesidade de ofrecer un programa deste tipo, que agora se vai ver feito realidade. As clases iniciaranse nas vindeiras semanas, e realizaranse os venres pola tarde no CDL do Torrón. As Concelleiras informaron da apertura do prazo de inscrición e reserva de praza, que dará paso á posta en marcha da iniciativa.

Loli Castiñeira, Concelleira de Formación: “Botamos a andar unha nova acción formativa, neste caso dirixida aos nosos maiores, que estamos seguros vai contribuír ao seu enriquecemento persoal e á mellora da súa calidade de vida”.

Tere Pérez, Concelleira de Benestar Social: “As políticas de Benestar Social seguirán a ter moi presentes aos nosos maiores. A colaboración coa Asociación de Xubilados e Pensionistas, ao igual que co resto do tecido asociativo do noso Concello, permiten obter resultados tan interesantes como o que hoxe se presenta”.

Marcos Besada, Alcalde de Salceda: “moitos dos nosos maiores non tiveron no seu tempo a oportunidade de acceder á educación como afortunadamente (e grazas a eles/as…) sí puidemos acceder os seus fillos/as e netos/as… Seguimos a estar en débeda con eles, e agora tócanos a nós intentar devolverlles o que eles fixeron por nós”.