Marc, o mono que naceu dun ovo, achega a transexualidade a Salceda

2018.05.18 Chrysallis

Chrysallis Galicia, Asociación de Familias de Menores Transexuais, da man da súa Vicepresidenta Eva Serantes, presentou en Salceda de Caselas o conto infantil “Marc, o mono que naceu dun ovo”. O relato, escrito por José Luis e Saúl Serantes Vaz, conta a historia de Marc, un mono que polo feito de ter nacido dun ovo está obrigado a ser unha ave, cando a realidade é que é un mono. Marc non consegue a súa felicidade ata que o seu entorno non o recoñece como o mono que sempre foi. Así, dun xeito didáctico e sinxelo, o conto busca achegarlles ás crianzas e aos seus proxenitores a realidade trans. A explicación completouse con un entretido obradoiro no que o público se converteu en detectives na busca de pistas que levasen a determinar as diferenzas entre un neno e unha nena, quedando claro que non existen tales diferenzas, senon que cada un será neno ou nena según o sinta, e non segundo indique o seu corpo. Para rematar o acto, Eva Serantes en nome da Asociación, fixo entrega de varios exemplares do libro á Biblioteca Municipal de Salceda, libros que foron recollidos pola Concelleira de Benestar Social e Igualdade Tere Pérez e polo Alcalde de Salceda, Marcos Besada.

Chrysallis segue así co seu intenso traballo de divulgación e información sobre a realidade trans centrándose sempre na poboación infantil e xuvenil. Lembra a asociación que dende aproximadamente os 2 anos, os nenos e nenas comezan a ser conscientes da súa identidade sexual, polo que a infancia trans amosa de forma espontánea a súa disconformidade co sexo asignado no momento do nacemento. Resulta fundamental para o benestar e a autoestima destas crianzas que se lles recoñeza polo nome co cal se identifican e que se lles permita vestirse e comportarse de acordo coa súa identidade sexual. Chrysallis está a desenrolar unha importante laboura tamén en numerosos colexios, con charlas e obradoiros para achegar esta realidade ao alumnado. Deste xeito, a Asociación anima a tódolos colexios do País a poñerse en contacto coa mesma, para poder levar as actividades a todos aqueles centros que o demanden.

Eva Vaz, Vicepresidenta de Chrysallis: “Queda moito camiño por andar, pero seguiremos a traballar intensamente polo recoñecemento dos dereitos das nosas crianzas transexuais, e pola mellora das súas condicións de vida. A clave está no respeto ao que cada quen queira ser, fuxindo de estereotipos e de ideas preconcebidas. Neste senso a sociedade de Salceda está a dar un grande exemplo, polo que sempre é un pracer facer este tipo de actividades na vila”.

Tere Pérez, Concelleira de Benestar Social e Igualdade: “A realidade trans está máis presente do que pensamos, pero aínda quedan por desgraza moitas persoas e familias que non se atreven a decilo, polo que a actividade de asociación como Chrysallis resultan fundamentais para que vexamos o mundo con outros ollos. Eva Serantes e toda a Asociación saben que contan co apoio do Concello de Salceda na loita pola visibilización da realidade trans, polo que todas as súas iniciativas serán benvidas neste municipio”.

 

Salceda de Caselas, 18 de maio de 2018