III Xornadas de Educación Vial en Salceda

O Concello de Salceda, a través das Concellarías de Tráfico e Ensino, ven de poñer en marcha a terceira edición das Xornadas de Educación Vial, en colaboración con Autoescola Caselas, que se iniciou hoxe luns 4 de maio. Esta iniciativa xurdiu hai dous anos, e tralo éxito acadado volven repetirse neste ano 2015. As xornadas están dirixidas aos escolares do municipio de Educación Infantil e 3º de Educación Primaria, que reciben formación teórica e práctica en materias de educación vial. A parte teórica corre a cargo do persoal da Autoescola Caselas, que lle ofrece ao alumnado unha sesión sobre os principais conceptos de seguridade infantil. Unha vez rematada a charla, os alumnos e as alumnas acceden a un circuito de karts no que poñen en práctica os conceptos adquiridos na formación teórica. O circuito está dirixido polos membros da Policía Local de Salceda, que lles dan aos cativos as instruccións precisas para unha correcta circulación pola vía pública, tanto dende o punto de vista dos conductores como dos peóns.

Uns 500 escolares pasarán polas xornadas, que se extenderán ata o venres 8 de maio. Farano dende o CEP Altamira, o CRA Raíña Aragonta, a Escola Infantil A Galiña Azul e o centro de Estimulación Temperá Manus. O obxectivo das xornadas é a concienciación dos máis pequenos, como unha importante vía para chegar aos pais e nais, en todo o relacionado coas boas prácticas nas vías públicas.

Os nenos e nenas reciben ademáis agasallos conmemorativos do seu paso polas xornadas, así como o seu correspondente diploma de asistencia.

Jose Luis González, Concelleiro de Tráfico: “afrontamos esta proposta como unha iniciativa fundamental para a concienciación de pequenos e maiores. Moitas veces a frase que un neno lle diga ao seu pai ou á súa nai ten máis efecto que calquera campaña que se presente dirixida aos adultos. A prevención resulta fundamental para a disminución de accidentes nas estradas, e esta parécenos unha forma axeitada de facelo”.

Teresa Pérez, Concelleira de Ensino: “agradecemos a boa disposición dos equipos directivos dos diferentes centros escolares de Salceda, que acollen esta e outras iniciativas que lles prantexamos dende o Concello sempre coa mellor actitude de colaboración. Formar aos máis pequenos é garantía de que chegamos aos maiores”.

 

Foto: Circuíto montado no Pavillón de Deportes para que os nenos e nenas practiquen os conceptos adquiridos.

 

Gabinete de prensa, 4 de maio de 2015